చిక్కుల్లో సంతోష్..!

వరుస షాకులతో షేక్ అవుతున్న సంతోష్..!

హైదరాబాద్ : జోగినపల్లి సంతోష్ రావు కు కొత్త తలనొప్పి మొదలైంది..! నిన్న కవిత చేసిన ఆరోపణలు సంతోష్ ను చిక్కుల్లో పడేసేలా ఉన్నాయి. ఆమె చేసిన ప్రధాన ఆరోపణల్లో నేరెళ్ళ ఘటన ఒకటి..! దేశ వ్యాప్తంగా సంచలనం సృష్టించిన నేరెళ్ళ ఘటన సంతోష్ చేయించినదే అని కవిత కుండబద్దలు కొట్టారు. సంతోష్ చేసి.. కేటీఆర్ పైకి నెట్టాలని చూశారని కూడా కవిత ఆరోపించారు.. ఇప్పుడు ఈ వ్యాఖ్యలు సంతోష్ మెడకు చుట్టుకున్నాయి..! కవిత చెప్పిన విషయాల ఆధారంగా సంతోష్ పై ఎస్సీ ఎస్టీ కేసు నమోదు చేసి దర్యాప్తు చేయాలని బాధితులు పోలీసులకు ఫిర్యాదు చేసారు.!

ఇంతకీ ఏమిటా ఘటన..?

రాజన్న సిరిసిల్ల జిల్లా పరిధిలోని నేరెళ్ళలో

ఇసుక లారీ ఢీకొని, ఓ వ్యక్తి మృతి చెందాడు. దీంతో ఆగ్రహించిన వ్యక్తి స్నేహితులు బంధువులు స్థానికులు నిరసన చేపట్టారు. అక్రమ ఇసుక దందాలో బాగంగా లారీలు టిప్పర్లు తీసుకువచ్చి తమ ప్రాణాలు తీస్తున్నారంటూ ఆవేదన వ్యక్తం చేశారు. బాధిత కుటుంబానికి నష్టపరిహారం ఇవ్వాలని డిమాండ్ చేశారు. అయితే ఎలాంటి స్పందన లేకపోవడంతో ఆగ్రహించిన బాధితులు పలు ఇసుక లారీలను తగులబెట్టారు. ఈ ఘటనకు సంబంధించి పోలీసులు కొందరిపై కేసులుపెట్టి అరెస్ట్ చేసి విచారణ పేరుతో చిత్రహింసలకు గురిచేశారు. 2017లో బీఆర్‌ఎస్‌ ప్రభుత్వ హయాంలో జరిగిన ఈ ఘటన జాతీయ స్థాయిలో సంచలనం సృష్టించింది.

బాధిత కుటుంబాలు నేటికీ తీవ్ర ఇబ్బందులు ఎదుర్కొంటున్నాయి..

సంచలన ఆరోపణలు చేసిన కవిత..!

బుధవారం ఎమ్మెల్సీ పదవికి, బీఆర్ఎస్ పార్టీ సభ్యత్వానికి రాజీనామా చేసిన సందర్భంగా ప్రెస్ మీట్ నిర్వహించిన కవిత హరీష్ రావు తో పాటు సంతోష్ రావు పై కూడా తీవ్ర ఆరోపణలు చేశారు.

నేరెళ్ళలో యువకులపై థర్డ్ డిగ్రీ ప్రయోగించిన పాపం వెనుక సంతోష్ హస్తం ఉందని ఆమె ఆరోపించారు..

ముఖ్యమంత్రి కేసీఆర్ వెన్నంటి ఉన్న సంతోష్ ముఖ్యమంత్రి కార్యాలయం ద్వారా పోలీసు ఉన్నతాధికారులకు ఫోన్ చేయించి..దళిత బీసీ బిడ్డలు దారుణంగా థర్డ్ డిగ్రీ ప్రయోగించేలా ఒత్తిడి చేశారని..పోలీసుల దెబ్బలతో తీవ్రంగా గాయపడిన యువకులు పూర్తిగా కాళ్లు చేతులు లేవలేని స్థితిలో అనారోగ్యం పాలవుతున్నారని, సంతోష్ పాపాల వల్ల ఏడు కుటుంబాలు దీనావస్థలో రోడ్డున పడ్డాయని కవిత స్పష్టం చేసారు. అంతే కాదు ఆ నెపాన్ని రామన్న ( కేటీఆర్ ) పై నెట్టివేసి బద్నాం చేసే కుయుక్తులకు పాల్పడ్డాడని.. సంతోష్ కుట్రల వల్ల రామన్న సొంత నియోజకవర్గంలో చాలా ఇబ్బందులు పడాల్సి వచ్చిందని కవిత మీడియా సమావేశంలో చెప్పారు.

ప్రస్తుతం తాజాగా నేరెళ్ల బాధితులు చేసిన ఫిర్యాదు రాజకీయంగా ప్రకంపనలు సృష్టిస్తోంది. గులాబీ పార్టీలో అలజడి రేపుతోంది.

ఇక సంతోష్ రావు సంగతి సరేసరి..! అసలే నిన్న కవిత ఇచ్చిన షాకులతో ఉక్కిరిబిక్కిరి అవుతున్న ఆయనకు నేరెళ్ళ బాధితులు ఇచ్చిన తాజా షాక్ మరింత దడ పుట్టిస్తుందనే చెప్పాలి..!

తీవ్ర ఆందోళనకు గురవుతున్నట్లు తెలుస్తోంది..

తాజా ఫిర్యాదుపై తంగళ్ళపల్లి పోలీసులు కేసు నమోదు చేస్తారా..? లేఖ పాత ఫిర్యాదు ఆధారంగా కొత్తగా దర్యాప్తు చేపడతారా అనే విషయం తెలియాల్సి ఉంది..

పోలీసులు తీసుకునే చర్యలపై ఉత్కంఠ నెలకొంది..

అసలే బిఆర్ఎస్ నేతలు ఎక్కడ చిక్కుతారా అని కాచుకుని కూర్చున్న అధికారపార్టీ నేతలు.. ఈ విషయంలో ఎలా స్పందిస్తారో చూడాలి..!

నిజంగానే కేసు నమోదు చేసి దర్యాప్తు చేపడితే.. సంతోష్ కు చిక్కులు తప్పకపోవచ్చు..!

బాధితులు కవిత చెప్పిన విషయాల ఆధారంగా కేసు నమోదు చేసి దర్యాప్తు చేసినా ఆశ్చర్యపోనక్కర్లేదు..!

చూడాలి అధికార పార్టీ ఎంచేయబోతోందో..!

...