సిరప్ కాదు విషం..!మరో రెండు కూడా ప్రాణాంతకమే..!

ప్రాణాంతక సిరప్ లపై తెలంగాణ ప్రభుత్వం అప్రమత్తం..!

మరో రెండు సిరప్ లపై నిషేధం..!

వారం వ్యవధిలో మూడు దగ్గు మందులపై నిషేధం..!

మధ్యప్రదేశ్ రాజస్థాన్ రాష్ట్రాల్లో పిల్లల ప్రాణాలు తీసిన దగ్గు మందులు..!

..........

హైదరాబాద్ : తెలంగాణ ప్రభుత్వం మరో రెండు దగ్గు మందులపై నిషేధం విధించింది. వారం వ్యవధిలోనే ఇప్పటివరకు మూడు కోల్డ్ సిరప్ లపై నిషేధం విధించింది.మధ్యప్రదేశ్ రాజస్థాన్ లలో కోల్డ్ రిఫ్ సిరప్ వల్ల పదుల సంఖ్యలో చిన్నారులు మృత్యువాత పడటం.. మరో ముప్పై మందికి పైగా చిన్నారులు తీవ్ర అనారోగ్యంతో హాస్పిటల్స్ లో చేరారు. దీంతో వెంటనే స్పందించిన మధ్యప్రదేశ్ ప్రభుత్వం కోల్డ్ రిఫ్ సిరప్ ను నిషేధించింది.

హానికరమైన సిరప్ ను పిల్లలకు సూచించిన డాక్టర్ ను అరెస్ట్ చేసింది. సిరప్ ను ఉత్పత్తి చేసిన తమిళనాడుకు చెందిన శ్రీసన్ ఫార్మా సంస్థ ఉత్పత్తులపై రాష్ట్రంలో నిషేధం విధించింది.. ఈ నేపథ్యంలో రాష్ట్రంలో వినియోగంలో ఉన్న కోల్డ్, కాఫ్ సిరప్ లపై భోపాల్ లోని డ్రగ్ టెస్టింగ్ లాబ్ లో పరీక్షలు చేయిస్తోంది.. కోల్డ్ రిఫ్ తో పాటు డాక్టర్లు సూచించిన ఇతర దగ్గు జలుబు ద్రవ ఔషధాలు రేస్పీ ఫ్రెష్ - టీఆర్, రిలైఫ్ - సీఎఫ్ సిరప్ లను నిషేధిస్తూ నిర్ణయం తీసుకుంది. గుజరాత్ రాష్ట్రానికి చెందిన రెండు వేరు వేరు ఫార్మా సంస్థలు ఈ హానికరమైన సిరప్ లను ఉత్పత్తి చేస్తున్నట్లు నిర్ధారించింది.

గుజరాత్ షేక్పార్ కేంద్రంగా కొనసాగుతున్న షేప్ ఫార్మా సంస్థ రేస్పీ ఫ్రెష్ - టీఆర్ సిరప్ ను ఉత్పత్తి చేస్తూ దేశవ్యాప్తంగా మార్కెట్ చేస్తోందని, గుజరాత్ అహ్మదాబాద్ జిల్లా పరిధిలోని బాల్వా బగోదరలో ఉన్న రెడ్ నెక్స్ ఫార్మా సంస్థ మరో హానికరమైన సిరప్ రిలైఫ్ - సీఎఫ్ సిరప్ ను ఉత్పత్తి చేస్తున్నట్లుగా మధ్యప్రదేశ్ ప్రభుత్వం తెలిపింది. కోల్డ్ రిఫ్ తో పాటు ఈ రెండు సిరప్ లను కూడా డాక్టర్లు పిల్లలకు సూచించారని.. ఇవి ప్రాణాంతకమైన డైథిలైన్ గ్లైకాల్ రసాయన మిశ్రమంతో రూపొందుతున్నవని పరీక్షా కేంద్రం నిర్ధారించినట్లు అధికారులు తెలిపారు.

మధ్యప్రదేశ్ ప్రభుత్వం సూచనతో అప్రమత్తమైన తెలంగాణ ప్రభుత్వం వెంటనే స్పందించింది.. ప్రాణాంతకమైన దగ్గు జలుబు సిరప్ లపై నిషేధం విధిస్తూ తెలంగాణ డ్రగ్ కంట్రోల్ అడ్మినిస్ట్రేషన్ ఉత్తర్వులు జారీ చేసింది.. నిషేధం విధించిన సిరప్ లపై అప్రమత్తంగా ఉండాలని... ఎట్టి పరిస్థితుల్లోనూ నిషేధిత సిరప్ లను వినియోగించకూడదని డ్రగ్ కంట్రోల్ అడ్మినిస్ట్రేషన్ ప్రజలకు సూచించింది.

....