కొండంత రచ్చ..!

కొండా సురేఖ..! తెలుగు రాష్ట్రాల్లో ఒక సంచలనం..! రెండు దశాబ్దాలకు పైగా రాజకీయాల్లో కీలకంగా వ్యవహరిస్తున్నారు..! నాటి ఉమ్మడి రాష్ట్రంలో దివంగత సీఎం వైఎస్ రాజశేఖర్ రెడ్డికి ఉత్తర తెలంగాణలో అత్యంత నమ్మకస్తురాలిగా సురేఖ గుర్తింపు పొందారు.. రక్తసంబంధానికి మించిన అన్నా చెల్లెళ్లుగా వాళ్ళలో ఆప్యాయత కనిపించేది..! వైఎస్ఆర్ ఆకస్మిక మరణం తర్వాత కూడా ఆ కుటుంబానికి ఎంతో అండగా నిలిచారు. వైఎస్ఆర్ మరణం తర్వాత తెలంగాణ ఉద్యమం పతాక స్థాయికి చేరుకోవడం..రాజకీయంగా ఉద్యమం తీవ్ర ప్రభావం చూపడం. రెండు ప్రాంతాల నేతలు, ప్రజల మధ్య కూడా దూరం పెరిగిపోవడం వంటి పరిణామాలు వేగంగా జరిగిపోయాయి. వైఎస్ఆర్ మరణం తరువాత కాంగ్రెస్ పార్టీతో విభేదించిన ఆయన తనయుడు జగన్మోహన్ రెడ్డి సొంతంగా వైఎస్సార్ కాంగ్రెస్ పార్టీని స్థాపించిన సమయంలో కూడా సురేఖ ఆయన వెంట నడిచారు. ఎమ్మెల్యేగా ఉన్న సురేఖ తన పదవికి రాజీనామా చేశారు. అదే సమయంలో జగన్ అక్రమ ఆస్తుల కేసులో సీబీఐ ఈడీల విచారణ ఎదుర్కొని జైలుకు వెళ్ళారు . పదహారు నెలలపాటు జైలులో ఉన్న జగన్ బయటకి వచ్చిన తర్వాత రాష్ట్రంలోఉదృతంగా కొనసాగుతున్న తెలంగాణ ప్రత్యేక రాష్ట ఉద్యమాన్ని కాదని తమ పార్టీ సమైక్య తెలంగాణకు కట్టుబడి ఉందని జగన్ ప్రకటించారు. అంతే కాదు..! డిసెంబర్ 9 2009 లో నాటి కేంద్రంలోని యూపీఏ ప్రభుత్వం ప్రకటించిన తెలంగాణ రాష్ట్ర ఏర్పాటు ప్రతిపాదనను కూడా వెనక్కి తీసుకోవాలని డిమాండ్ చేస్తూ దీక్ష కూడా చేశారు. అప్పటికే కొండ సురేఖ జగన్ పార్టీలో చేరి పరకాల నియోజకవర్గంలో ఉప ఎన్నికకు సిద్ధమయ్యారు. జగన్ ను ఎన్నికల ప్రచారానికి పిలిపించే ప్రయత్నం చేసారు. తెలంగాణకు ద్రోహం చేసిన వైఎస్ కుటుంబంతో ఒక తెలంగాణ బిడ్డగా ఎలా సన్నిహితంగా ఉంటూ వారి పార్టీ నుండి ఎలా ఎన్నికలలో పోటి పడుతున్నారంటూ తెలంగాణ వ్యాప్తంగా కొండా కుటుంబంపై వ్యతిరేకత వ్యక్తమైంది.. అయినప్పటికీ అప్పట్లో ప్రజల్లో కొండా సురేఖకు ఉన్న ఫాలోయింగ్, వైఎస్ఆర్ అభిమానుల అండ తోడవడంతో ఉప ఎన్నికల్లో అత్యంత స్వల్ప తేడాతో ఓడిపోయారు..! ఓడినా సరే..! ఆమెదే నైతిక విజయమంటూ సురేఖపై నాడు రాయలసీమ ఆంధ్ర ప్రాంత ప్రజలు ప్రశంసలు కురిపించారు. మాటకు కట్టుబడి ఉండే ధైర్యం..మానసిక స్థైర్యం.. ధాటిగా మాట్లాడే తీరు నాడు అందరినీ ఆకట్టుకుంది. సురేఖ కు పార్టీలకు అతీతంగా అభిమానులు పెరిగిపోయారు. .

అయితే నాటి సురేఖకు నేడు మంత్రిగా ఉన్న సురేఖకు అసలు పోలికే కనిపించడం లేదు..! ఇపుడు ఏది మాట్లాడినా.. ఏ విషయం పై అభిప్రాయం వ్యక్తం చేసినా వివాదాస్పదమే అవుతోంది. ఆమె మనసులో ఏదో అనుకుంటూ..బయటకు ఇంకోటి మాట్లాడుతున్నారు. కాంగ్రెస్ ప్రభుత్వంలో మంత్రిగా బాధ్యతలు చేపట్టిన నాటి నుండి సురేఖ చేస్తున్న వ్యాఖ్యలు వ్యవహరిస్తున్న తీరు అత్యంత వివాదాస్పదమౌతోంది.! కొన్నిసార్లు ఆమె కామెంట్స్ సెల్ఫ్ గోల్ చేసుకుంటున్నట్లుగా ఉంటున్నాయని సొంత పార్టీ నేతలు ఆందోళన వ్యక్తం చేస్తున్నారు.

నాగార్జున కుటుంబంపై హాట్ కామెంట్స్..!

అక్కినేని నాగార్జున తనయుడు నాగ చైతన్య, నటి సమంత వివాహ బంధం విడాకులకు దారితీసిన పరిస్థితులపై ఆమె చేసిన వ్యాఖ్యలు తెలుగు రాష్ట్రాల్లోనే కాదు దేశమంతటా దుమారం రేపాయి. దేశవ్యాప్తంగా గుర్తింపు ఉన్న సమంత గురించి ఒక మహిళా మంత్రి తీవ్రమైన ఆరోపణలతో అభ్యంతరకరమైన వ్యాఖ్యలు చేయడమేంటని సినీ రాజకీయ క్రీడా రంగాలకు చెందిన ప్రముఖులు నేరుగానే మీడియా, సోషల్ మీడియా ద్వారా నిలదీశారు..! ప్రధానంగా మహిళలు ఆమె వ్యాఖ్యలపై తీవ్ర అభ్యంతరం వ్యక్తం చేశారు. మొత్తంగా ఈ వ్యవహారం కాంగ్రెస్ పార్టీ అధిష్టానానికి కూడా తలనొప్పులు తెచ్చిపెట్టింది. మొదట్లో తన వ్యాఖ్యలను సమర్ధించుకున్న సురేఖ.. ప్రజలనుండి వ్యక్తమవుతున్న స్పందన చూసి వెనక్కి తగ్గారు. దీనికి తోడు అధిష్టానం కూడా చివాట్లు పెట్టడంతో.. మొత్తంగా సమంతకు క్షమాపణలు చెప్పారు. సురేఖ వ్యాఖ్యలపై అభ్యంతరం వ్యక్తం చేసిన అక్కినేని నాగార్జున కోర్టులో ఆమెపై కేసు వేశారు. కోర్టు లో కూడా సురేఖ తన వ్యాఖ్యలపై సంజాయిషీ ఇచ్చుకోవాల్సి వచ్చింది.

కేసీఆర్ కుటుంబంపైనా వివాదాస్పద వ్యాఖ్యలు..!

.

తెలంగాణ ఏర్పడిన తర్వాత బీఆర్ఎస్ అధికారంలోకి రావడం.. కేసీఆర్ ముఖ్యమంత్రి కావడంతో రాష్ట్రంలో రాజకీయ పరిస్థితులు పూర్తిగా మారిపోయాయి. జగన్ పార్టీ కి దూరమైన తర్వాత కొన్నాళ్లపాటు రాజకీయాల్లో అంటీముట్టనట్లుగా వ్యవహరించారు..! కాంగ్రెస్ పార్టీకి కాస్త దగ్గరైనప్పటికీ చురుకుగా ఉండలేకపోయారు..! స్థానిక రాజకీయ పరిస్థితులు, రాష్ట్రంలో కాంగ్రెస్ పార్టీ అంతంత మాత్రంగానే ఉందన్న భావనతో గతంలో తాము తీవ్రంగా వ్యతిరేకించిన బీఆర్ఎస్ పార్టీకి దగ్గరయ్యే ప్రయత్నం చేసారు. హరీష్ రావు ద్వారా సంప్రదింపులు చేసి పార్టీలో చేరేందుకు కొండా దంపతులు సిద్ధమయ్యారు. ఉమ్మడి వరంగల్ జిల్లా పార్టీ నేతలు వ్యతిరేకించినప్పటికీ వారించిన కేసీఆర్ కొండా దంపతులను పార్టీలో చేర్చుకున్నారు. అయితే 2018 ఎన్నికల సమయంలో టికెట్ల విషయంలో పేచీ రావడం, అప్పటికే జిల్లా రాజకీయాల్లో కొనసాగుతున్న ఆధిపత్య పోరు వల్ల ఎంత వేగంగా దగ్గరయ్యారో... అంతే వేగంగా ఆ పార్టీ నుండి బయటకు వచ్చారు. కొన్నాళ్ల పాటు మళ్ళీ మౌనంగా ఉండిపోయారు. హుజూరాబాద్ ఉప ఎన్నికల సమయంలో కాంగ్రెస్ పార్టీకి దగ్గరయ్యారు. రేవంత్ ఆధ్వర్యంలో ఆ పార్టీలో చేరిపోయి 2023 ఎన్నికల్లో ఎమ్మెల్యేగా గెలిచి మంత్రిగా కూడా నియమితులయ్యారు. అయితే మంత్రి పదవి ఆమెలో ఒకవిధమైన మార్పును తెచ్చినట్లు కనిపిస్తుంది.ఎడాపెడా ఎవరిమీద పడితే వాళ్ళమీద వివాదాస్పద వ్యాఖ్యలు చేయడం, సొంత పార్టీ నేతలమీద కూడా పరోక్ష విమర్శలు చేయడం చేస్తూ వస్తున్నారు. ఇక కేసీఆర్ కేటీఆర్ కవితలపై ఆమె తీవ్ర స్థాయిలో చేస్తున్న విమర్శలు, వాడుతున్న పదాలు అభ్యంతరకరంగా ఉంటున్నాయనే అభిప్రాయం రాజకీయ వర్గాల నుండి వ్యక్తమవుతోంది!

తోటి మంత్రులపైనా హాట్ కామెంట్స్..!

తెలంగాణ ప్రభుత్వం అత్యంత ప్రతిష్టాత్మకంగా భావించిన కులగణన గణాంకాలపై అసెంబ్లీలో చర్చ జరిగింది. బీసీల జనాభా శాతంపైనా వివాదం చెలరేగింది. బీసీల జనాభాను తక్కువ చేసి చూపిస్తున్నారంటూ మొదట్లో బీసీ సంఘాలు ఇతర పార్టీలు ప్రభుత్వంపై ఆరోపణలు చేశాయి. అయితే కులగణన గణాంకాలను అసెంబ్లీలో ముఖ్యమంత్రి స్వయంగా ప్రకటించాలని ముందుగా నిర్ణయించుకున్నారు.. అయితే అంతకు ముందే మంత్రి ఉత్తమ్ కుమార్ రెడ్ ప్రెస్ మీట్ పెట్టీ కులగణన వివరాలు గణాంకాలను ప్రకటించారు. దీంతో తీవ్ర ఆగ్రహానికి గురైన మంత్రి కొండా సురేఖ శాసనమండలి లో పరోక్షంగా విరుచుకుపడ్డారు. కులగణన వివరాలు ఒక్కటి కూడా లీక్ కాలేదని.. వేరేవాళ్లు చెప్పేది తప్పుడు లెక్కలని, ముఖ్యమంత్రి అధికారికంగా ప్రకటించేవి మాత్రమే అసలైన కులగణన వివరాలని స్పష్టం చేసారు. ఈ వ్యవహారం కూడా అధికార కాంగ్రెస్ పార్టీకి తలనొప్పులు తెచ్చిపెట్టింది.! మరో ఇద్దరు మంత్రులపైనా ఆమె చేసిన వ్యాఖ్యలు ప్రభుత్వ పరంగా పార్టీ పరంగా వివాదాస్పదమయ్యాయి.

ఒకటి అనుకోవడం..ఇంకోలా మాట్లాడటం..!

మా ప్రభుత్వం గత ప్రభుత్వం మాదిరిగా కాదని..ఇచ్చిన హామీలకు కట్టుబడి ఉండే పార్టీ అంటూ చెప్పడానికి చేసే ప్రయత్నంలో కొండా సురేఖ చేస్తున్న వ్యాఖ్యలు ఆమె ఆలోచనలకు విరుద్ధంగా ఉంటూ ఇబ్బందులు తెచ్చిపెడుతున్నాయి.. మహిళా మంత్రిగా ఉన్నత బాధ్యతల్లో ఉన్న కొండా సురేఖ ఆ మధ్య ఇంట్లో శుభకార్యం సందర్భంగా బంధువైన యువతితో వీడియో కాల్ మాట్లాడుతూ మద్యంపై చేసిన వ్యాఖ్యలు కూడా అటు ప్రభుత్వానికి..ఇటు వ్యక్తిగత ప్రతిష్టకు కూడా ఇబ్బందులు తెచ్చిపెట్టాయి. ప్రభుత్వం చేస్తున్న మంచిపనులు, గత బీఆర్ఎస్ ప్రభుత్వ వైఫల్యాలను వివరించే క్రమంలో కూడా తరచూ ఆమె వివాదాస్పదంగానే మాట్లాడుతున్నారనే అభిప్రాయం వ్యక్తమవుతోంది..!

.

తాజా వ్యాఖ్యలతో రాజకీయ దుమారం..!

సురేఖ తాజాగా చేసిన వ్యాఖ్యలు రాజకీయంగా తీవ్ర దుమారం రేపుతున్నాయి. ఓ కార్యక్రమంలో మాట్లాడుతూ.. మంత్రిగా ఉన్నాం కాబట్టి కొన్ని కంపెనీలవి, సంస్థలవి ఫైల్స్ క్లియరెన్స్ కోసం వస్తుంటాయి..! మామూలుగా అయితే మంత్రులు డబ్బులు తీసుకొనిదే ఫైల్స్ క్లియర్ చేయరు..! కానీ..! నేను అలా కాదు.. నాకు నయాపైసా ఇవ్వాల్సిన పనిలేదని, మా పేరుమీద ఉన్న స్కూల్ అభివృద్ధికి సహకరించాలని కోరానంటూ సంచలన వ్యాఖ్యలు చేసారు..! మంత్రి సురేఖ వ్యాఖ్యలను అస్త్రంగా మార్చుకున్న బీఆర్ఎస్ కాంగ్రెస్ ప్రభుత్వంపై మంత్రులపై విమర్శల దాడి చేస్తోంది..!

బీఆర్ఎస్ వర్కింగ్ ప్రెసిడెంట్ కేటీఆర్ వెంటనే స్పందించారు. కొండా సురేఖకు శుభాకాంక్షలు చెబుతున్నామని, రాష్ట్రంలో ఉన్నది కమీషన్ సర్కార్ అని, మంత్రులకు ముప్పై శాతం ముడుపులు ఇవ్వనిదే ఫైల్స్ కదలవని, స్వయంగా ప్రభుత్వంలోని మంత్రే ఈ విషయాన్ని నిర్ధారించారని ఎక్స్ లో కామెంట్స్ చేశాడు. అంతే కాదు. మంత్రుల అవినీతిపై ముఖ్యమంత్రి లేదా రాహుల్ గాంధీ విచారణ జరిపించి చర్యలు తీసుకోవాలని కూడా కేటీఆర్ డిమాండ్ చేశారు.

తన వ్యాఖ్యలు వివాదస్పదం కావడంతో గంటల వ్యవధిలోనే మంత్రి కొండా సురేఖ నష్ట నివారణ చర్యలు ప్రారంబించారు. ప్రెస్ మీట్ పెట్టీ తన వ్యాఖ్యలకు వివరణ ఇచ్చుకునే ప్రయత్నం చేసారు. తాను యథాలాపంగా మంత్రులు అన్నానే తప్ప కాంగ్రెస్ మంత్రులు అని చెప్పలేదని, బీఆర్ఎస్ నేతలు పనిగట్టుకుని తన వ్యాఖ్యలకు తప్పుడు అర్థాలు తీస్తూ దుష్ప్రచారం చేస్తున్నారని వివరణ ఇచ్చారు. వెంటనే వాళ్లు మీడియాలో దుష్ప్రచారం ఆపకపోతే సైబర్ క్రైమ్స్ లో బీఆర్ఎస్ నేతలపై ఫిర్యాదు చేస్తానంటూ హెచ్చరించారు!

మొత్తం మీద తరచూ వివాదాస్పద వ్యాఖ్యలతో సొంత పార్టీ నేతలకు సొంత ప్రభుత్వానికి ఇబ్బందులు తెచ్చిపెడుతున్న సురేఖ ఇకనైనా తన వైఖరి మార్చుకోవాలని, ఏదైనా వేదికపై సందర్భంలో మీడియా ముందు మాట్లాడే ముందే ఆయా అంశాలపై కొంత సమాయత్తం కావడం మంచిదని, మాట్లాడే సమయంలో జాగ్రత్తగా వ్యవహరించాలని పార్టీ వర్గాలు సూచిస్తున్నాయి...!

•••••••••••