కాలేజీలో లాకర్లు పగులగొట్టి కోటి ఎత్తుకెళ్లారు..!

హైదరాబాద్ : కాంగ్రెస్ ఎమ్మెల్యే కసిరెడ్డి నారాయణ రెడ్డికి చెందిన ఇంజనీరింగ్ కళాశాలలో చోరీ జరిగింది.. కాలేజీ కార్యాలయం డోర్ లాక్ ను, నగదు దాచి ఉంచిన లాకర్లను పగులగొట్టి దొంగలు కోటిరూపాయల నగదును ఎత్తుకెళ్లారు..

పక్కా ప్లాన్ తో చోరీ చేసిన దొంగలు సీసీ కెమెరాల ఫుటేజ్ పోలీసులకు దొరక్కుండా డివిఆర్ ను కూడా ఎత్తుకెళ్లడం విశేషం. అందులో దాదాపు రెండు వందల సీసీ కెమెరాలకు చెందిన రికార్డింగ్ ఫుటేజ్ ఉన్నట్లు సమాచారం.

రంగారెడ్డి జిల్లా అబ్దుల్లాపూర్ మేట్ లో కసిరెడ్డి నారాయణ రెడ్డి బ్రిలియంట్ ఇంజనీరింగ్ కాలేజీ నిర్వహిస్తున్నారు. గురువారం సాయంత్రం కాలేజీ సిబ్బంది అంతా వెళ్ళిపోయిన తర్వాత రాత్రి పూట చోరీ ఘటన జరిగినట్లుగా తెలుస్తోంది. కాలేజీలో ఉన్న ఆఫీసు గది తాళాలు పగులగొట్టి లోనికి ప్రవేశించిన దొంగలు లోపల ఉన్న సేఫ్ లాకర్లు పగులగొట్టి అందులో దాచిన డబ్బు మొత్తం ఎత్తుకెళ్లినట్లుగా గుర్తించారు. బ్రిలియంట్ గ్రూప్ కు చెందిన మూడు కళాశాలల డబ్బు లాకర్లలో దాచి ఉంచినట్లుగా తెలుస్తోంది.. డబ్బు చోరీ చేసిన అనంతరం సీసీ కెమెరాల టెక్నికల్ రూమ్ కు వెళ్లి డీవీఆర్ ను కూడా దొంగలు ఎత్తుకెళ్లారు..

తెలిసిన వాళ్ళ పనే!

డబ్బు ఎక్కడ దాస్తారో తెలుసు..! సీసీ కెమెరాల డీవీఆర్ ఎక్కడ ఉంటుందో తెలుసు..! అంతడబ్బు దాచి ఉందని తెలుసు..! అన్నీ తెలుసు కాబట్టే.. లాకర్లను పగులగొట్టగల పరికరాలు తీసుకువచ్చి మరీ చోరీ చేశారు. సాధారణంగా రాత్రిపూట తెలియని భవనంలో చోరీ చేయాలంటే అంత సులువు కాదు..! చీకట్లో వెతుక్కోవడం కష్టం అవుతుంది. ఒకవేళ పగటి పూట రెక్కీ చేసినా.. ఇంత వివరంగా తెలుసుకోవడం కుదరదు..! అంత డబ్బు దాచి ఉంచిన విషయం బయటివాళ్లకు తెలిసే అవకాశం లేదు.. దొంగతనం సీనియారిటీ ఉన్నాకూడా తెలుసుకోవడం కష్టం అవుతుంది.. అన్ని నిశితంగా గమనిస్తే డబ్బు నిర్వహణ విషయాల గురించి కాస్త తెలిసిన వాళ్లే పక్కాగా ఈ చోరీలో పాత్ర వహించి ఉంటారనే అనుమానాలు రావడం సహజమే.. కాలేజీ యాజమాన్యం ఫిర్యాదుతో కేసు నమోదు చేసిన పోలీసులు దర్యాప్తు చేస్తున్నారు. సిబ్బందిని కూడా విచారిస్తున్నట్లు తెలుస్తోంది..!

.....